1 Kronieken 20
01In t veujoar, in tied dat keunenks wènd wazzen weer op oorlogspad te goan, rukte Joäb mit zien leger oet. Hai verrinnewaaierde t laand van de Ammonieten en belegerde Rabba. David was in Jeruzalem achterbleven. Joäb veroverde Rabba en muik dij stad mit de grond liek
02David pakte heur keunenk zien kroon van kop òf en vernam dat dij wel n talent aan zuver gold woog; der zat ook nog n kostboare edelstain in. David druig dij kroon in t vervolg zulm. Hai sleepte ook nog hail wat roofgoud tou dij stad oet.
03Hai luit bewoners van de stad noar boeten brengen en heur in stokken zoagen mit stainzoagen, en mit iesdern houwailen en heksebielen kepothaauwen.
Dat dee David mit ale aander steden van de Ammonieten. Dou ging David mit zien volk weerom noar Jeruzalem.
04n Zet loater was ter bie Gezer sloagerij mit de Filistijnen. Doar sluig Sibbechai oet Chusa Sippai dood, ain van de Refaïeten. Dij mozzen zok dou wonnen geven.
05Ook was ter vechterij mit de Filistijnen, woarbie Elchanan, n zeun van Jaïr, Lachmi versluig, dij n bruier van Goliat oet Gat was. Schaft van Lachmi zien speer was zo dik as n weversboom.
06Weer loater was ter sloagerij bie Gat. Doar was n reus van n kerel mit aan elke haand zès vingers en aan elke vout zès tonen, mitnkander vaaierntwinneg vingers en tonen. Hai was ook n Refaïet.
07Hai haar de gugel mit de Isrelieten, mor Jonatan, n zeun van David zien bruier Sima, sluig hom dood.
08Aal dijent wazzen Refaïeten oet Gat; ze binnen om haals brocht deur David en zien soldoaten.
|
